Tetun: PR ATRIBUI MEDALLA MÉRITU BA ATLETA YOHAN GONÇALVES
Palásiu Prezidensiál Nicolao Lobato, 17 Marsu 2023.
Prezidente Repúblika, José Ramos-Horta, Kinta-Feira ne’e, atribui medalla Méritu ba atleta esquiador alpinu Yohan Carlos Goutt Gonçalves, tanba promove Timor-Leste nia naran iha mundu.
“Nia fuan no klamar pertense ba Timor-Leste, nune’e nia lakohi reprezenta Fransa, tinan hira nia-laran tuir kompetisaun ho Bandeira Timor-Leste nian. Rekoñesimentu mak ita atribui medalla méritu tanba ita konsidera hanesan embaixadór ida, Timor-oan sira seluk ne’ebé partisipa iha jogu no atividade seluk iha mundu,’’ Fundamenta Xefe Estadu.
Atribuisaun medalla ba atleta Franco-Timorense, Yohan Carlos Goutt Gonçalves, bazeia ba dekretu Prezidensiál númeru 17/2023, hanesan rekoñesimentu ba partisipasaun atleta ne’e nian iha jogu olímpliku.
Xefe Estadu mos rekorda katak, iha nia mandatu dahuluk (2007-2012), sempre rekoñese sidadaun Timor-oan, inklui estranjéiru ba dedikasaun ruma ne’ebé halo promosaun ka diplomasia internasionál, hodi naran Timor-Leste, liu-hosi atividade oi-oin.
“Orgullu tebes, bele reprezenta ha’u nia mama nia rai ho Bandeira Timor-Leste iha jogu olímpiku no ohin ha’u bele simu kondekorasaun méritu ida ne’e husi Xefe Estadu, nune’e hakarak agradese Prezidente Repúblika,’’ Expressa Atleta Yohan.
Atleta Yohan partisipa iha jogu olímpiku ho modalidade hanesan Esquiadór alpinu, iha Pequim iha loron 04 to’o 20 Fevereiru 2022 no konsege hetan medalla no sai atleta Timor-oan dahuluk ne’ebé dada Bandeira Timor nian iha eventu refere.
Sekretáriu Estadu Juventude no Desportu, Abrão Saldanha, konsidera atleta Yohan Carlos Goutt Gonçalves merese simu kondekorasaun.
“Ita tuir kompetisaun barak ona, maibé konforme konvite, diferente ho atleta Yohan ne’e, tanba ba ho méritu, nia ba jogu olímpiku invernu ne’e ho kualifikasaun rasik. Nia merese ba medalla méritu, nu’udár rekoñesimentu estadu nian,’’ Afirma membru governu ne’e.
Governante ne’e fiar katak, atleta Timor oan ne’e sei mobiliza atleta internasionál, hodi apoia promosaun Timor-Leste nia nasran iha mundu.