Tetun: FAMÍLIA AFETADU APRESIA APOIU UMANITARIU HUSI PREZIDENTE REPÚBLIKA

Dili, 7 Ábril 2021 Espoza Prezidente Repúblika Cidália Nobre Lopes Mouzinho Guterres no Chefe casa civil Francisco Maria de Vasconcelos kontinua hodi apoiu umanitaria husi Prezidente Repúblika ba família afetadu inundasaun iha kapital Dili no Hera. Hafoin fahe nesesidade bázika ba família afetadu, Chefe Casa Civil afirma katak apoiu umanitariu hirak ne’e, nuudar jestu solidariedade hosi Prezidente Repúblika Francisco Guterres Lú Olo ba nia povu ne’ebé mak hetan Impaktu maka’as husi désastre naturais. “Prezidente hakarak espresa nia solidariedade no hakarak apoia ba populasaun ne’ebé afetadu ba dezastre naturais. Ida ne’e mak realidade katak, Prezidente Repúblika tau matan ba nia povu sira.” Chefe Casa Civil, hatete. “Fatin barak-barak ne’ebé ami ba horsehik ho Ohin maioria presiza biti, sumasu, manta no bee mos no bee ba haris fatin alende ne’e ahi. Ita espera katak governu bele responde, tanba ita hotu hatene katak inundasaun ne’e akontese iha fatin barak.” Espoza Prezidente hato’o agradese ba timoroan sira ne’ebé mak responsabel, servisu maka’as hodi tau matan ba família afetadu iha hela fatin provizoriu hanesan iha igreja, eskola, insitutuisaun estadu. Iha vizita Espoza Xefe Estadu fo korajen nafatin ba família afetadu atu hasoru situasaun kalamidade dezastre naturais ne’ebé mak afeita makas tebes. Alende ne’e espoza agradese ba timoroan iha rai-laran ka estranjeirus, individu ka grupu, organijasaun sosiedade sivil, empreza, ajénsia internasionál ne’ebé apoiu ona família afetadu. Purtantu Kordenador grupu João Paulo II aldeia 12 de Outobru suku Comoro Postu Administrativu Dom Aleixo, Laurentino Martins, apresia ba tulun ne’ebé mak sira hetan husi Prezidente Repúblika nia espoza, tanba ne’e sustenta ona sira nia moris. “Ami apresia ho apoiu umanitariu ne’ebé ita-nia Prezidente Repúblika oferese ba ami nu’udar povu afetadu. Ami nafatin agradese tulun boot ne’ebé ami hetan nune’e bele responde no sustenta ami família lubuk hela hamutuk (Bairo Joao Paulo-red) nia nesesidade. Iha Aldeia Mota Kiik, Hera família afetadu agradese tebes ba Espoza Prezidente Repúblika no chefe casa civil ho kometiva solidariza apoiu umanitariu ba família afetadu. “Ami orgullu no kontente ba vizita, ami familia afetadu agradese sasan ne’ebé mak mai apoiu ami, ida ne’e hanesan valór boot ba ami komunidade.” Rosito Braga, dehan. Akompanha iha atividade distribuisaun sasan apoiu umanitariu Prezidente Repúblika, husi parseiru Plan Internasionál, Rede-Feto no Fundasaun Sadia. Fatin ne’ebé mak apoiu ba hanesan:

1. Igreja Bidau Mota Klaran ba família uma kain 42 totál abitante 182 ho nesesidade hanesan  Manta (25), biti (25), Xa (dos-5), supermie (kaixa 20), fos saka-15, biskuit kaixa-10, country jus dos-6, indomilk dos 6, masin-midar, mina dos-5.

2. Fatin Patrimonio Estadu Bairo Joao Paulo II totál uma-kain 96 no abitante kuaze kuaze-500 hetan apoiu fos saka-45, supermie dos-30, contry jus dos-10, indomilk dos-10, mina dos-5, Biskuit dos-14, masin dos-4, masin-midar plastiku 30, xa dos-10, manta 50, biti-20, energen dos-10 no caban dos-5. 3. Bairo Maslidun Tasi Tolu: energen dos-10, supermie dos-20, masin dos-10, caban dos-10, indomilk kaixa-10, jus dos 5, mina dos-5, masin midar, xa dos-10 fos saka-25, biskuit dos-10, Daia dos-10, eskoba dos-5, pepsodent dos-5. 4. Hera Santa Bakhita: fos saka-20, supermie-20, biti-40, manta-40, mina dos-6, indomilk no jus dos-15, masin dos-5, sabaun dos-10, masin-midar karon-1, xa dos-5, biskuit dos-10, Daia dos-10, eskoba ho pepsodent dos 10, energen dos-10. 5. Hera parte SD eis Brimob: fos saka-20, supermie kaixa-20 manta ho biti hamutuk 40, mina dos-5, indomilk ho jus dos-30, masin dos-5, sabaun kaixa-20, masin-midar saka-2, biskuit kaixa-20, Daia-20, eskoba no pastadente kaixa-10 no energen kaixa 20. Relasiona be-dalan ka barajen hodi satan mota, iha parte Hera ne’ebé iha tempu inundasaun estraga komunidade nia uma barak no balun nia uma mota sobu total, verbalmente Chefe Casa Civil simu ona dadus, tanba ne’e sei hato’o ba Prezidente Repúblika hodi komunika ho governu.

Alende ne’e, Chefe Casa Civil afirma katak Prezidénsia Repúblika sei kordena ho Ministériu Obras Públika hodi hadi’ak be-dalan ka barajen hodi satan-mota, nune’e bainhira hadi’a fila fali uma, labele hetan nafatin dezastre naturais.